Reglur

Í Reykjavíkurmaraþoni Íslandsbanka gilda reglur alþjóðafrjálsíþróttasambandsins IAAF um götuhlaup sem sjá má á vef Frjálsíþróttasambands Íslands. Til viðbótar við þær reglur gilda einnig eftirfarandi reglur Reykjavíkurmaraþons um Reykjavíkurmaraþon Íslandsbanka.

1. Þátttakendur bera sjálfir ábyrgð á að kynna sér þær reglur sem gilda um þátttöku í Reykjavíkurmaraþoni Íslandsbanka og fylgja þeim eftir í einu og öllu. Brot á reglum geta ógilt þátttöku í hlaupinu.
2. Allir þátttakendur sem skrá sig í Reykjavíkurmaraþoni Íslandsbanka eru á eigin ábyrgð.
   Börn eru á ábyrgð foreldra.
   Hlaupabrautin er ekki alveg lokuð umferð og því mikilvægt að sýna aðgát. Allir þátttakendur eru beðnir að kynna sér skipulag á marksvæði, varðandi hraðahólf og skipulagðar útgönguleiðir. (Sjá nánar hér).
3. Þátttakendur skulu hefja hlaupið á auglýstum tíma. Tímatökukerfið er eingöngu virkt á þeim tíma.(Sjá nánar hér).
4. Tímatöku lýkur sex og hálfri klukkustund eftir að fyrsta vegalengd er ræst. Þeir sem koma í mark eftir það fá ekki skráðan tíma.
5. Þátttakendur skulu hafa hlaupanúmerið sýnilegt að framan, allan tímann á meðan hlaupinu stendur. Hlaupanúmer er skráð á ákveðinn þátttakanda og gildir eingöngu fyrir þann einstakling. Frávik frá þessu ógildir tímatöku.
6. Hver þátttakandi fær númer með áfastri flögu. Þátttakendur bera ábyrgð á að númerið sé skráð á þeirra nafn og það sé eingöngu notað af þeim sem skráðir er fyrir númerinu. Til þess að fá skráðan tíma verður að festa númerið framan á bolinn. Ef það er ekki gert gildir: „ekkert númer = enginn tími". (Sjá nánar hér) 
7. Ekki er hægt að skipta um vegalengd þegar hlaup er hafið. Sá sem hleypur aðra vegalengd en skráning segir til um er ekki inni í tímatöku hlaupsins og er ekki gildur þátttakandi.
8. Aldurstakmörk eru í vegalengdir Reykjavíkurmaraþons Íslandsbanka. Maraþon 42,2 km er fyrir 18 ára og eldri (einstaklingar fæddir árið 2006 og áður geta tekið þátt). Hálfmaraþon 21,1 km er fyrir fimmtán ára og eldri (einstaklingar fæddir árið 2009 og áður geta tekið þátt). 10 km hlaup er ætlað fyrir 12 ára og eldri og er ekki æskilegt fyrir yngri börn (einstaklingar fæddir árið 2012 og áður geta tekið þátt). Fólk á öllum aldri getur skráð sig í skemmtiskokkið sem er 3 km með möguleika á að stytta sér leið og verður leiðin þá 1,7 km.
9. Þátttakendur skulu kynna sér hlaupaleiðir og eingöngu hlaupa eftir þeirri braut sem skilgreind hefur verið af hlaupahaldara. Hlaupabrautin er eingöngu ætluð keppendum. Ekki er heimilt að fylgja hlaupurum gangandi, hlaupandi, á hjóli eða öðrum farartækjum. Það er á ábyrgð þátttakenda að vísa frá þeim sem vilja fylgja. (Sjá nánar hér um undanþágu fyrir fatlaða þátttakendur)
10. Reykjavíkurmaraþon áskilur sér rétt til að vísa þeim frá, sem eru á hjóli eða öðrum farartækjum á hlaupabrautinni eða nálægt hlaupandi þátttakendum.
11. Þátttakendum er óheimilt að þiggja þjónustu af öðrum en starfsmönnum hlaupsins í formi matar, drykkja eða líkamlegs stuðnings nema í neyð. Þá ber að tilkynna slíkt til hlaupstjóra.
12. Þátttakendum er ekki heimilt að hafa meðferðis hunda eða önnur gæludýr í hlaupinu.
13. Þátttakendum í 21,1 km og 42,2 km er ekki heimilt að hafa meðferðis kerrur eða vagna.
14. Þátttakendum í 10 km og skemmtiskokki er heimilt að hafa meðferðis kerrur eða vagna en verða að vera aftast þegar hlaupið er ræst.
15. Ekki er heimilt að taka þátt í hlaupinu á vél- eða rafmagnsknúnum farartækjum, reiðhjóli, hlaupahjóli, línuskautum, hjólabretti, skíðahjólum eða handdrifnu hjóli (hand-cycle).
16. Þátttakendur með göngustafi skulu stilla sér upp aftast í upphafi hlaups. (Sjá nánar hér)
17. Þátttakendur í hjólastól skulu haka við það í skráningarferlinu að þeir taki þátt í hlaupinu í hjólastól og með önnur hjálpartæki, skulu vera aftast í upphafi hlaups. Hægt er að kynna sér upplýsingar fyrir hreyfihamlaða þátttakendur hér.
18. Þátttakendur skulu sýna öllum starfsmönnum hlaupsins kurteisi og fara eftir leiðbeiningum og fyrirmælum þeirra.
19. Þátttakendur skulu sýna öðrum hlaupurum tillitssemi, og hafa í huga almennar umferðareglur.
20. Til að veitt verði verðlaun fyrir þjú efstu sætin verða þrjú eða fleiri af hverjum kynjaflokki í hverri vegalengd að hefja hlaup.
21. Þegar þátttakendur hafa lokið hlaupi er þeim ekki leyfilegt að fara aftur út á braut til þess að hlaupa með öðrum þátttakendum.
22. Hverskyns ósæmileg framkoma, skeytingarleysi um lög eða virðingarleysi við mannhelgi og mannréttindi getur leitt til brottrekstrar úr hlaupinu.

Dómstóll Reykjavíkurmaraþons tekur við áfrýjunum frá þátttakendum 30 mín eftir að úrslit eru ljós en er einnig ráðgefandi fyrir hlauphaldara vegna fyrirspurna er berast um reglur hlaupsins og framkvæmd.