Pétur Sigurðsson lést þann 23. júní síðastliðinn. Hann hafði þá háð hetjulega baráttu á gjörgæsludeild Landsspítalans í Fossvogi í 11 daga eftir alvarlegt vinnuslys.

Engin orð taka í raun utan um það starf sem fram fer á gjörgæsludeildinni. Pétur okkar var hetjan í þessu stóra verkefni en það fólk sem hjálpaði honum í því eru magnaðar manneskjur.
Við fjölskylda Péturs óskum engum þess að kynnast starfi gjörgæslunnar en á sama tíma erum við svo auðmjúk og þakklát. Þarna starfar fólk sem á til mestu manngæskuna, vinnur óeigingjörn verk sín af einstakri yfirvegun og fagmennsku. Hjá þeim svífur yfir andi kærleikans í garð allra sem þar koma sem sjúklingar og okkar ástvina þeirra. Hjá þeim er kærleikurinn dýpri en hafið og hærri en himininn.
Við sem stóðum álengdar og fylgdumst með trúum á hið góða og finnum fyrir svo djúpu og innilegu þakklæti í garð þessa einstaka fólks.

Við viljum heiðra minningu Péturs okkar, dásamlegs eiginmanns, föður, afa og vinar með því að hlaupa í hans nafni. Allir hlauparar hópsins hlaupa fyrir Styrktarfélagið Von, sem er félag til styrktar skjólstæðinga gjörgæsludeildar LSH í Fossvogi.