Vökudeildin tók við dóttur okkar, Indíönu Ósk sem fæddist eftir tæplega 25 vikna meðgöngu en síðustu 5 vikurnar var Indíana án legvatns. Lungun hennar voru mjög veik en hún sjálf ótrúlega kraftmikil og ákveðin lítil kona. Við eyddum tæpum 7 mánuðum með henni á Vökudeildinni þar sem við upplifðum svakalegasta rússíbana lífs okkar. Á tímabili leit út fyrir að hlutirnir væru að ganga upp og hún kæmist heim með okkur en tíminn leiddi það í ljós að hlutirnir voru ekki að ganga upp, lungun hennar voru einfaldlega of veik.

Allan þennan tíma var okkar nánasta fjölskylda og vinir hinu megin á landinu og við höfðum í raun fáa nákomna að fyrir sunnan. Starfsfólkið hélt þó ótrúlega vel utan um okkur og sýndi okkur svo mikinn kærleika og umhyggju. Þau héldu utan um okkur á okkar erfiðustu tímum og voru alltaf til staðar. Þau eru í raun eina fólkið sem kynntist Indíönu almennilega og við fundum á hverjum degi hversu ótrúlega vænt þeim fannst um hana.

Indíana náði að snerta hjörtu svo margra á sinni stuttu ævi með persónuleika sínum og þrautseigju. Vökudeildin gaf okkur mjög dýrmætan tíma og tækifæri til að kynnast elsku dóttur okkar.