Ég hleyp hálfmaraþon fyrir vinnustaðinn minn: Ljósið, enda gífurlega meðvituð um mikilvægi starfseminnar sem þar fer fram!! Í Ljósinu fær fólk með krabbamein sérsniðna og endurgjaldslausa endurhæfingu- og stuðning; þjónusta sem er einstök á heimsvísu. Þjónustuþegar hitta iðjuþjálfa, sjúkraþjálfara, íþróttafræðinga, markþjálfa og jafnvel sálfræðinga (mig), eftir þörfum hvers og eins. Að auki byggir mikið af starfinu á jafningjastuðningi og er mikil áhersla lögð á að skapa vettvang fyrir einstaklinga með krabbamein til að kynnast öðrum í svipaðri stöðu.

Ég fékk leyfi til að láta öll áheiti sem safnast í mínu nafni renna í ákveðna starfsemi í Ljósinu: jafningjastuðning fyrir 25 ára og yngri. Við og íslensk félög sem styðja við krabbameinsgreinda skilgreinum ungt fólk vanalega sem einstaklinga undir 40 ára. Sem betur fer er ekki algengt að fólk í kringum tvítugt greinist með krabbamein en þegar það gerist er óheppilegt ef eini jafningjastuðningurinn sem þeim býðst er mestmegnis skipaður fólki á allt öðru æviskeiði. Síðan í vor hefur Ljósið því skipulagt hóphittinga fyrir þjónustuþega undir 25 ára til að þau fái jafningjastuðninginn sem við vitum að skiptir sköpum fyrir andlega líðan og félagslegan stuðning í þessu ferli.

Við erum að skipuleggja haustið með hópnum um þessar mundir og allt fjármagn sem safnast af mínum áheitum mun nýtast vel til að styðja við þennan hóp og bjóða þeim upp á skemmtilegri hittinga og hópefli!