Ég hef glímt við kvíða, áráttu- og þráhyggjuröskun síðan ég var unglingur og þessar geðraskanir hafa náð að orsaka þunglyndi, ofát og aðra kvilla í gegnum tíðina, í mismiklum mæli þó. Eftir að hafa grennt mig um 55 kg með aukinni hreyfingu og útiveru á síðustu árum er ég á nokkuð góðum stað í dag en ég nota þó einnig kvíðalyf sem halda mér mun stöðugri en áður.

Ástæðan fyrir því að ég vel að styrkja BUGL er sú að mínar geðraskanir hafa talsvert dregið úr hamingju minni frá unglingsaldri. Þó ég sé almennt sáttur við tilveruna í dag, hef ég fundið það á eigin skinni hversu erfitt það er að vera alltaf með kvíðann, áráttuna og þráhyggjuna sem bakgrunnstónlist í lífinu. Ef það er hægt draga úr alvarleika þessara (og annarra) geðraskana frá unga aldri, eða kenna börnum og unglingum að lifa með þeim, mun það auka til muna lífsgæði þeirra.