Tilgangur Solaris - hjálparsamtaka fyrir hælisleitendur og flóttafólk á Íslandi er að að bregðast við þeirri neyð sem umsækjendur um alþjóðlega vernd og flóttafólk býr við víða á Íslandi, sem birtist meðal annars í bágum aðstæðum, félagslegri einangrun og skorti á aðgengi að nauðsynlegri þjónustu, eins og til dæmis heilbrigðisþjónustu. 

Markmið samtakanna er að hvetja til umbóta í málefnum fólks á flótta og stuðla að því að mannúð og réttlæti sé haft að leiðarljósi. Að berjast fyrir bættri stöðu flóttafólks hér á landi og fyrir því að mannréttindi þeirra og önnur grundvallarréttindi séu ávallt virt. Þá eru samtökin vettvangur fyrir fólk með flóttabakgrunn til þess að segja sögu sína og vekja athygli á málefnum flóttafólks.

Solaris standa fyrir valdeflingu, mannlegri reisn og samkennd og endurspeglast það í starfi samtakanna.